Friday, October 9, 2015

從真情扣家用到小學選班長

免費早餐 - 徐家健
從真情扣家用到小學選班長
2015年10月08日
安仔搵到錢俾家用善姨,天經地義;小學班長選個考第一嘅,亦合情合理。師父教落,經濟學家要有common sense 。以下兩個個案說明常識之重要。

師奶劇個案:有一百個理由支持興建機場第三跑道,但以「共同承擔,用者自付」為藉口逃避公眾監察,真係情何以堪。機管局行政總裁林天福口材一流,要繞過立法會時便說「三跑計劃以用者自付原則進行,機管局全力承擔,完全沒有考慮過由政府包底」;想拖全港市民落水時就話「部分借貸將透過零售債券籌集,希望令市民覺得計劃是香港人有份」。一時用者自付,一時共同承擔,劇情錯綜複雜。

這是我對「共同承擔,用者自付」的真情remake:安仔結婚買新屋,間樓寫佢名。因為供樓自己全力承擔,佢同善姨講以後唔再俾家用。善姨身旁的容姨喃喃自語:「供書教學嗰陣邊個全力承擔? 有毛有翼曉飛啦。」但即使唔俾家用,安仔份積蓄始終唔夠俾首期,安仔唯有向叉燒炳等全屋三十幾人借,希望他們覺得買屋計劃是屋企人有份的。容姨又按捺不住:「夾錢就有份! 」夠錢俾首期唔夠錢供樓,安仔於是把新屋的幾間客房租俾屋企人,實行用者自付。容姨睇唔過眼向安仔發砲:「有份又要交租? 」為息事寧人安仔宣布財務新安排,工人房減租但要向家人借到盡。容姨要安仔向家人保證有錢還,安仔話將來我俾少啲家用又收多啲房租咪有錢還囉。叉燒炳終於真情流露:「生舊叉燒好過生你!」安仔話依法辦事:「後生為買樓唔俾家用,冇得司法覆核。」難堪唔難堪

常識話我知,停止派息同唔俾家用即使未必犯法,都係冇嚟貴格。

小學雞個案 :有一百個理由反對陳文敏教授做副校,但以經濟學家身份質疑法律學者的學術水平,實在令人尷尬。經濟學相信專業分工,撈過界公開向其他學科指手劃腳的人往往自討苦吃。在比較優勢之下,美國研究突出的學者少有積極參與大學行政工作。香港的情況可以不同,就拿香港大學做例子吧,就拿香港大學的經濟學者做例子吧。香港大學出過行政管理能力超卓的經濟學教授,有的曾任校長,有的做過副校,都有能力影響教員僱用升遷。行家撈過界,萬一被對家反過來質疑我們這些老行尊學術水平未夠班,到時無端端俾人清算「影響因子」,尷尬唔尷尬?

常識話我知,大學選副校唔同小學選班長,唔係要選個考第一嘅。

作者為克林信大學經濟系副教授、中文大學經濟系客座副教授
http://www.facebook.com/economics3.0
逢周一至五刊出

No comments:

Post a Comment

買新盤只是跟金管局對着幹 免費早餐: 徐家健

免費早餐: 徐家健 買新盤只是跟金管局對着幹 2017-06-19 我買過三架車,都是新車。買第一架車時在美國開始工作不久,即使車行貸款息口不低,亦只有蝕利息慢慢供。買第二架車時現金已不是問題,但由於車行給予近乎零息貸款優惠,最後還是借到盡慢慢供。買第三架車時香港車...