Thursday, November 26, 2015

坤了老闆黃雀在後

免費早餐 - 渾水
坤了老闆黃雀在後
2015年11月25日
又係時候講一講金融圈殼股界的八卦事,最近這間公司適逢巨變,我覺得這是一個互相鬥呃人的局,好值得自己借鏡。
渾水曾幫一間上市公司做一單小刁,數額不大,六位數而已。後來我同其他做金融的行家講起,大家好不屑同好擔心,都只問一個問題:「你收唔收到尾數?」原來這間上市公司的掌舵人是行內有名的老千。渾水新仔入行唔識世途,但總算收到尾數也屬可喜可賀。大概因為條數唔大,而且又係上市公司錢,都費事呃我。

再後來向前輩學習,自己對行內運作潛規則又多了幾分了解。行內有一種最基本的賺錢方式是「呃人工」,嚴格來講又唔算呃,只不過你吹到好大咁解,令老闆信你落搭覺得你勁咁解。我一直都想行這條路,可惜我的前輩話我講嘢唔得,性格又唔夠圓滑,注定唔可以靠吹水發圍。

這位呃人工的老千首先老點一位前投行trader拿一嚿錢組一隻基金,隻基金結果在香港買一隻創仔殼。咁當然,這位老千又幾百萬元人工,連其家臣都幾百萬元人工,又有些低行使價option咁,都算賺唔少。

但這隻殼是白買的,因老千買完隻殼唔識點做,而嗰位前投行trader又唔夠錢,控股權一直押在證券行。大體上買了一隻殼可以行兩條路,一係真心做實業,其次就係做賊。這間行的員工不乏一些賊性難馴的金融才俊,理論上做賊是無問題的,不過因為老千都係呃人工,點會同你用心搞?經濟學上,這叫做principal agent problem,因為老千只會maximize自己的利潤而不是股東的利潤。

後來,市場消息指,這位前投行trader在大陸俾人捉了,結果公司資金鏈斷了,公司又要面臨清盤,隻殼又無埋。不過,老千在這間公司都賺唔少錢,例如佢出事左近行使了購股權,賺了一筆;人工又賺了一筆,公司本身有一些高估的科技項目,當中又撈了一筆油水。這一位會計師出身的老千,成功點了前ibanker。

但在人吃人的世界,出得嚟行遇咗要還,最近這位老千會計師比一位星級投行分析員吃了。這又是後話,有機會再續談。

作者為九十後財經傳媒人、粗讀經濟學的偽文青 https://www.facebook.com/muddydirtywater
逢周一至五刊出

No comments:

Post a Comment

當非理性除牌遇上技術性調整 徐家健 經濟3.0

2017年10月17日 徐家健 經濟3.0 當非理性除牌遇上技術性調整 一句「不要怕,只是技術性調整」,言下之意是大時代裏股民有時反應過敏,因此股價才需要技術性調整回復正軌。今屆諾貝爾經濟學獎得主塞勒(Richard Thaler),便是憑研究人類在市場上種種非...