Saturday, February 6, 2016

財經資訊應該要娛樂化

免費早餐 - 渾水
財經資訊應該要娛樂化
2016年02月05日
提提大家,渾水也是一名財經記者,有追看過我的朋友就會知道我寫的東西個人風格都幾強,文字盡最都抵死,胡鬧一點。用意好簡單,都係為了搶睛奪目。好啦,自讚完了,其實我咁樣做就係為了開新市場,同埋呢個亦都看似係大趨勢。
客觀的現實是現在全行財經傳媒的讀者數目、點擊率都不停在下降當中。因為財經資訊跟大市是相關系數好高,如果大市好,個個讀者都仆住去留意財經資訊,至少睇下有邊隻股票好買嘛。
不過,現在大市偏淡了,財經資訊的需求自然下跌,而且財經唔同政治、副刊、娛樂。講政治,由政客到維園阿伯都可以講,至於副刊、娛樂就係鬥juicy,個個啱睇,完全唔難理解。
反而財經資訊係比較複雜同技術性多一點,讀者群本身已經有了限制,所以流失了的讀者短期不易撈回來。
財經版娛樂化其實係為了撈讀者,好簡單咁講,大路講股票都係會搬會計指標、又PE(市盈率)或PB(市帳率)咁,間中又睇下圖,其實大眾如果無最基礎的財經知識,都幾難消化呢類資料。
娛樂其中一個目的,係將內容生活化、簡單化,方便吸收。而且,現在主軸都係唱淡,股票又淡、經濟又淡、樓市又淡,開手機apps睇行家前輩的B1,日日都以為係世界末日。財經資訊娛樂化其實都係有安撫成分,勉強都係一種精神勝利法。日日都悲觀都咁,其實都好難過日子。
現在財經資訊都有「潮文」化的趨勢,例如你寫一篇搞笑貼地的抽水文章,點擊率會一定高過大師如何引用經濟理論、旁徵博引甚麼數據的分析文章。向西村上春樹的曲線抽擊潮文,各大財經媒體都有在網上版報道 ,結果惹來湯文亮直線攻擊回應,某程度上反映了湯博士不懂網絡文化,以及傳媒生態的細微轉變。
現在財經媒體主打係捕捉一些外國人財演講話內容,又或者講樓市。因為樓係生活必需品,個個愛睇。
至於娛樂化的公式好簡單,不妨留意一些新盤,通常都會有個「八十後」、「九十後」被人捉了去做訪問。問咩?當然係問首期點睇啦,然後報道的hidden agenda就係「成功需父幹」。其實邊個屋苑跌幾多,筆者真係無興趣,反而呢類,點擊率往往好高。
至於我渾水本人,技術性文章又寫,娛樂性質重的又寫。無計,搵食係要有多幾門武器。
作者為九十後財經傳媒人、粗讀經濟學的偽文青

No comments:

Post a Comment

增加透明度打擊圍標 免費早餐: 梁天卓

免費早餐: 梁天卓 增加透明度打擊圍標 2017-08-16 競爭法實施了近兩年,競委會最近頻頻出擊。繼今年3月就一宗IT界的圍標案援引該條例入稟後,日前競委會再就大廈單位裝修涉嫌合謀定價向10間建築工程公司入稟,指涉案公司在為觀塘某公共屋邨提供裝修服務時涉嫌違反了...