Thursday, March 3, 2016

曹Sir解釋黃成智的一無所有

免費早餐 - 渾水
曹Sir解釋黃成智的一無所有
2016年03月02日
曹Sir曹仁超離去,留下的是點點投資智慧,其中一句勉勵年輕人「目光要遠大,不要只著眼一間500方呎樓,不要讓500方呎綁住你的青春。」不停在網上流傳。同時,關於黃成智落敗後去向也有流傳,上年佢同拍檔狄志遠組新思維時公開自薦公職搵銀,俾人挖了出來考古。
補選既完,各歸本位。梁天琦繼續學業,哪吒(方國珊)繼續不怕海龍王,專心區議會;法律背景的專業人士也不用操心,透明人大概也有董事袍金。唯獨是黃成智,真係無人知佢的政治前途同錢途點行下去?網民玩考古,友刊有篇舊訪問《一無所有,我頂得住》解釋佢一段財困的生活,而原因就是正如曹Sir所講,因為亂買了樓。
據資料,當時黃成智見自己月入四萬五好威威,雙料議員加社工,結果心雄96年買樓上車。之後唔使問都知,當然高位摸貨,成了負資產。後來佢又好景不常,太太要洗腎,大概黨內黨外競爭激烈,輸晒議席,頓失所有收入。層樓又要供,黃口無飽期,仲要還債,所以一無所有財困了。
然後訪問最精妙的句子出現了!後來黃成智「無意中發現『前立法會議員』這個名銜原來好好用」,之後搞talk做speaker賺外快。換言之,為了生活、樓,佢只好利用自己的立法會議員光環去吸金維生。這是一個活生生例子,解釋為甚麼非精英背景的泛民咁需要議席,同時點解選民會指責佢地當份工返毫無寸進,做乜都甘之如飴,因為一旦佢地無呢個光環,真的幾困難。
歸根究柢,黃成智要供樓養家但收入又唔穩定,為錢為生活的日子有幾難捱,佢自己心裡有數。佢應驗了曹Sir的智慧,因為理財不善所以做乜都綁手綁腳。曹Sir的智慧同辛棄疾所講的「求田問舍,怕應羞見,劉郎才氣」係同一道理,大丈夫無志氣只顧擔心樓啊田啊,劉備會睇你唔起。我唔買樓,唔係因為睇唔啱、未見底之類,而係因為唔想成為第二個黃成智。講真,無謂去到幾廿歲人,先行第三死路,反璞歸真玩超人打怪獸啦。
不過話晒匯點人才輩出,孕育了白宮發言人,都叫惜日黨友嘛,馮煒光可能會幫佢一把呢。
寫到這兒,真替黃成智有點心酸,唔小心喊濕了一包紙巾。這滴淚,同鼎一樣,係為香港而流。呢個故事教訓我地,年輕人千祈唔好亂咁買樓。
作者為九十後財經傳媒人、粗讀經濟學的偽文青

No comments:

Post a Comment

為電車男申冤 徐家健 經濟3.0

2017年10月3日 徐家健 經濟3.0 為電車男申冤 當我的電動車剛走了超過了5萬公里,申訴專員劉燕卿宣布為全港電車男申冤:「政府的政策目標是要本港成為亞洲區內最廣泛使用電動車的地區之一,在政府鼓勵下,電動私家車的數目迅速增長,但為人詬病的是公共電動車充電器數...