Sunday, April 10, 2016

潮到富二代喪爭的招股書

免費早餐 - 渾水
潮到富二代喪爭的招股書
2016年04月08日
因為星期五輕鬆一點,所以講一講金融圈子的一些小八卦。最近有一隻新股將會上市,我無意去推介,因為我完全望唔透呢門生意做乜,只係有一個好特別的現象去分享。富二代多玩意係人都知,只是無留意原來招股書都有得儲。
我上星期同一位富二代朋友TW食飯打邊爐,佢本身唔係做金融,話明富二代嘛,當然唔使做啦。不過,佢手上拿一本黑白兩間的招股書,上面印住潮流品牌HypeBeast(8359),佢話覺得好型,所以想儲起來。
同行另一位富二代創作人朋友Playboy文亦託我要一本。問我借錢就話難啫,要拿招股書易過借火。我在中環拿了幾本,佢竟然放下工作,親自由灣仔特登去中環同我交收。我真係有點一頭霧水,股票有人買就話信啫,招股書都可以搶,真係離晒大譜。
因為這隻股票將會上市,很多傳媒、網媒的生活副刊版都有報道。
根據報道,Hypebeast早在於2008年就獲《時代雜誌》選為50個最佳網站之一。也因為採用英文為主的內容,因此往往給人一種「美國網上雜誌」為主的形象,至於Facebook like,原來都有超過200萬。公司營運我冇乜概念,不過,數字有少少感覺。本身香港人做的英文網,我對上有印象又大成功的只有9gag。
後來,有做開娛樂的行家話俾我知,原來這本咁「潮」的招股書網上有人拍賣,開價30美金,認真夠誇。原來我不知不覺將幾千蚊送了俾人,早知我自己都keep多幾本啦。
至於本招股書,我覺得無乜特別,都係黑白底雙間。不過,我係一個無藝術觸覺的人,所以也作不得準。
至於Hypebeast這間公司有幾潮,個business model有幾勁我真係好似望住杯青島咁望唔透。因為我全身著緊的都是樸實無華,連自由行都唔吼的「豬二千」、「扑死你」、「左單奴」等實用名牌。
聞說「腰力高」減價,星期六、日我都應該去掃掃貨。所以,潮流這味嘢,我識條鐵咩。至於那本黑白雙間的招股書,我身邊有一本,價值30美金,誠意讓俾潮人富二代。
作者為九十後財經傳媒人、粗讀經濟學的偽文青 https://www.facebook.com/muddydirty...

No comments:

Post a Comment

為電車男申冤 徐家健 經濟3.0

2017年10月3日 徐家健 經濟3.0 為電車男申冤 當我的電動車剛走了超過了5萬公里,申訴專員劉燕卿宣布為全港電車男申冤:「政府的政策目標是要本港成為亞洲區內最廣泛使用電動車的地區之一,在政府鼓勵下,電動私家車的數目迅速增長,但為人詬病的是公共電動車充電器數...