Monday, May 23, 2016

炒子華黃牛飛代表唔尊重佢?

免費早餐 - 渾水
炒子華黃牛飛代表唔尊重佢?
2016年05月20日
無聊睇網上轉載廣告,見到男神黃子華幫城中連鎖快餐店賣廣告,然後出現比林日曦跟蔣議員更耐人尋味的矛盾。
網民大多留言反應:「個like係比(俾)黃子華!不過呢(間)餐廳我就唔buy囉。」賣廣告可以賣出公關災難,但最搞笑在個災難唔係去咗拍的主角嗰度,而是去咗俾錢的廣告客戶。正路來講應該係車毀人亡一起陪葬,好像負皮唯唯同信用卡廣告咁,今次真係好神奇,足見男神魅力。
子華因為見到香港依家咁笑唔出,唔做棟篤笑,轉搞舞台劇。我看過子華套《咁愛咁做》一次,得罪講句萬箭穿心的話,我睇唔明黃子華的舞台劇,所以我對子華舞台劇的期望無棟篤笑咁大,不過,還是身體很誠實地去買飛,當然係食白果。
買唔到門票係有點無奈,黃牛幾乎是唯一出路。根據香港公眾娛樂場所條例Section 6,不合理地以高價轉售黃牛係唔得的。兩年前,我去美國洛杉磯睇NBA,都遇到相同問題,當時我係透過中介人買飛去解決呢個問題。
在香港,買黃牛係被看成不尊重表演者的行為,林日曦都會網上叫人唔好買黃牛。也許,個別的黃牛炒作同賣假飛係真係本質上唔公平同唔尊重,但如果好似美國NBA咁,由認受性強的Broker中介嚟轉售,會唔會係一個對支持者、中介、表演者都好的三贏分配制度?
買演唱會飛同黃牛的原理跟股票世界的大陸新三板也是相通。因為沒有成熟、有效、高流通量的二級市場,所以無得轉售,而價錢也不真實地反映股票價值。黃牛飛也一樣,因為無轉售的二級市場,演唱會搞手又定價過低,所以變相又係反映唔到真正價值。好多時,你唔排除表演當日有急事無法出席,與其浪費張飛,倒不如以市場方式轉贈有心人,這不涉及炒作,但對大家都係有利。
至於演唱會門票的分配機制跟股票也是相近,正常主板股票設有國際配售同公開發售兩條隊,原理是等同演唱會門票有贊助商分銷和城市電腦售票網。國際配售的分配係由證券行決定,演唱會的贊助商想俾門票邊個,都係內部決定,例如很多保險公司會藉此以門票去取悅客人。
公開發售同城市電腦售票網咪即係排隊買飛咁囉。不過,演唱會唔夠股票咁,有2種機制可以提高分配效率,演唱會門票唔似股票咁有回撥機制,有時國際配售的額度會撥去公開發售嗰度,透明度高好多。另一樣,就係無二級市場,即係無得買黃牛。至於原因?咪因為交易成本問題囉。
作者為九十後財經傳媒人、粗讀經濟學的偽文青 https://www.facebook.com/muddydirty...

No comments:

Post a Comment

當非理性除牌遇上技術性調整 徐家健 經濟3.0

2017年10月17日 徐家健 經濟3.0 當非理性除牌遇上技術性調整 一句「不要怕,只是技術性調整」,言下之意是大時代裏股民有時反應過敏,因此股價才需要技術性調整回復正軌。今屆諾貝爾經濟學獎得主塞勒(Richard Thaler),便是憑研究人類在市場上種種非...